ချက်လက်မှတ်ဖြင့်ငွေထုတ်ရာတွင် လိုက်နာရမည့်အချက်များ

ချက်လက်မှတ်တွင်ပါရှိရမည့် အချက်များမှာ-

၁။ ချက်လက်မှတ်၏ ရှေ့ ဘက်တွင် ဘဏ်ကရိုက်နှိပ်ထားသော (၁)ဘဏ်ခွဲတံဆိပ်၊ (၂)ငွေစာရင်းအမှတ် နှင့် ကျောဘက်တွင် (၃) အခွန်ဆောင်ပြီးတံဆိပ် မပါရှိလျှင် ဘဏ်ကထုတ်ပေးသော ချက်လက်မှတ်ဟု ယူဆမည် မဟုတ်ပါ။ (ထို့ကြောင့် ချက်လက်မှတ်စာအုပ် လက်ခံရရှိတိုင်း ချက်လက်မှတ် တစ်ရွက်ချင်း၌ ဖော်ပြပါတံဆိပ်များ ပါရှိ၊ မပါရှိ စစ်ဆေးရန် ချက်လက်မှတ်စာအုပ်ပိုင်ရှင် (Customer) ၌တာဝန်ရှိပါသည်။ ထိုတံဆိပ်များ မပါရှိပါက တင်ပြလာသော ချက်လက်မှတ်ကို ဘဏ်များက ငွေထုတ်ပေးရန်ငြင်းဆန်၍ ငြင်းပယ် ချက်လက်မှတ် (Returned Cheque) အဖြစ် သတ်မှတ်ခြင်းခံရမည် ဖြစ်ပါမည်။)

ချက်လက်မှတ်ပိုင်ရှင် (Customer) ကာယကံရှင်ကိုယ်တိုင် ဖြည့်စွက်ရမည့် အချက်များမှာ-

၂။      ချက်လက်မှတ်၏ ရှေ့ဘက်တွင်(၁)ရက်စွဲ ဖြည့်ရပါမည်။ ငွေထုတ်ယူမည့်ရက်ကို အနီးစပ်ဆုံးဖော်ပြ ရပါမည်။

၃။ ငွေသားထုတ်ပေးရမည့်သူနေရာ(၂)တွင် ချက်လက်မှတ်ပိုင်ရှင်ဖြစ်ပါက “ကိုယ်တိုင်” ဟုလည်းကောင်း၊ ကိုယ်စားလှယ်ဖြစ်ပါက “အမည်နှင့် နိုင်ငံသားစိစစ်ရေး ကဒ်အမှတ်” ကို လည်းကောင်း၊ ချက်လက်မှတ် ပိုင်ရှင်က ပြည့်စုံစွာဖြည့်သွင်းပေးရပါမည်။

၎။ ဘဏ်ကထုတ်ပေးရမည့်ငွေ လေးထောင့်အကွက်ရှည် (၃) ရှိကျပ်ပေါင်း----------၌ “ကျပ်ပေါင်း” နှင့် ကပ်လျှက် ထုတ်ယူမည့်ငွေကို မြန်မာဘာသာ သို့မဟုတ် အင်္ဂလိပ်ဘာသာ “စာသားဖြင့် ရေးသွင်းကာ” နောက်ဆုံး၌တိတိ (Only) ဟူသော စာလုံးထည့်ပေးပါရန်၊ ဤအကွက်၌ပါသော စာသားနှင့် ဂဏန်းအကွက်၌ ပါသော ထုတ်ယူမည့်ငွေပမာဏကို ချိန်ကိုက်မည်ဖြစ်ပါသည်။ ဥပမာ- ကျပ်ပေါင်းတစ်သိန်းတိတိ ၊ ဖြစ်နိုင်သမျှ ကျပ်ပေါင်းနှင့် ကပ်လျှက်ရေးပါရန်၊ သို့မှသာ မသမာသူက ထပ်မံဖြည့်စွက်ခြင်းဘေးမှ ကာကွယ်ပြီးဖြစ်ပါမည်။ သို့မဟုတ်ပါက ကျပ်ပေါင်း   တစ်သိန်းတိတိ၊ “ကျပ်ပေါင်း” နှင့် ထုတ်ယူလိုသောငွေ ကျဲနေပါလျှင် မသမာသူက ကျဲနေသော နေရာတွင် လိုအပ်သလို ထပ်မံဖြည့်၍ ငွေလိမ်ထုတ်နိုင်ပါသည်။

၅။   ယင်းလေးထောင့်ကွက်ရှည်၏ ညာဘက်လေးထောင့်ကွက်ကို (၄) ရှိ ကျပ်--------၌ “ ကျပ်” နှင့်ကပ်လျှက် ထုတ်ယူမည့်ငွေကို “ဂဏန်း” ဖြင့်ရေးသားကာ နောက်ဆုံး၌ ထပ်မံဖြည့်စွက်မရအောင် /- အမှတ်အသားကို ထည့်ပေးရပါမည်။ ဥပမာ ကျပ် ၁၀၀,၀၀၀/- ဖြစ်ပါသည်။ တက်နိုင်သမျှ “ကျပ်” နှင့် ကပ်လျှက်ရေးပါရန် ၊ သို့မှသာ မသမာသူက ထပ်မံဖြည့်စွက်ခြင်းဘေးမှ ကာကွယ်ပြီးဖြစ်ပါမည်။ သို့မဟုတ်ပါက ကျပ် ၁၀၀,၀၀၀/- ကျပ်နှင့် ထုတ်ယူလိုသောငွေ ကျဲနေပါလျှင် မသမာသူက ကျဲနေသောနေရာတွင် လိုအပ်သလို ထပ်မံဖြည့်၍ ငွေလိမ်ထုတ်ယူနိုင်ပါသည်။

၆။ ဤအမှတ်(၃)နင့်(၄)တို့ကို ဖြည့်စွက်ရာ၌ချက်လက်မှတ်ပိုင်ရှင် ကာယကံရှင်/တပ်မတော်အရာရှိကိုယ်တိုင်သာ ဖြည့်စွက်သင့်ပါ သည်။ နိုင်ငံရပ်ခြား/ ရပ်ဝေးသွားနေပါက မိမိရရှိမည့် (လစာ) ၀င်ငွေ၌ ချေးငွေ၊ အသက်အာမခံငွေ၊ အခြား မမျှော်လင့်သော ဖြတ်ငွေတို့ကို ချန်လှပ်၍ ထုတ်ယူမည့်ငွေကို အနီးစပ်ဆုံး ထောင်ဂဏန်းဖြင့် ဖြည့်သွင်းပေးရမည် ဖြစ်ပါသည်။ အကယ်၍ မိမိငွေစာရင်း၏ လက်ကျန်ငွေကို မသိရှိပါက ကာယကံရှင်/ တပ်မတော်အရာရှိကိုယ်တိုင် စာရေး၍ ဘဏ်ခွဲမန်နေဂျာသို့ တောင်းခံနိုင်ပါသည်။ တယ်လီဖုန်းဖြင့် တောင်းခံခြင်းဟူသမျှကို ဘဏ်၏ ဒါရိုက်တာအဖွဲ့က ပြန်ကြားခွင့်(လုံးဝ) ခွင့်မပြုပါ။ ကာယကံရှင်/ တပ်မတော်အရာရှိကိုယ်တိုင် လာရောက်၍ နယ်ဘဏ်ခွဲများ၌ လက်ကျန်ငွေစာရင်းကို မေးမြန်းလာပါလျှင် နယ်ဘဏ်ခွဲမန်နေဂျာကိုယ်တိုင် ကာယကံရှင်/ တပ်မတော်အရာရှိ၏ ရှေ့ မှောက်တွင် ရန်ကုန်ဘဏ်ခွဲမန်နေဂျာထံ မေးမြန်းအသိပေးရန် ခွင့်ပြုထားပါသည်။

၇။     အရေးကြီးဆုံးမှာ ချက်လက်မှတ်၏အသက် (၅) ချက်လက်မှတ်ပိုင်ရှင်ကိုယ်တိုင်၏ ထိုးမြဲလက်မှတ် သည် ဘဏ်၌ပေးထားသော ထိုးမြဲလက်မှတ်နမူနာနှင့် တူညီရပါမည်။ မတူညီပါက (Returned Cheque) ဖြစ်ပါမည်။ ဤလက်မှတ်သည် ဘဏ်ကို “ ညွှန်ကြားခြင်း၊ အမိန့်ပေးခြင်း” ၏ အသက်ဖြစ်သည်။ ထိုးမြဲ လက်မှတ်ရေးထိုးရမည့်အပြင် (တပ်မတော်အရာရှိများအတွက်) မိမိ၏ ပြန်တမ်းဝင်အမှတ်၊ အမည်နှင့်ရာထူး/အဆင့်ကိုလည်းကောင်း၊ အခြား(Customer) များဖြစ်ပါမူအမည်၊ နိုင်ငံသားစိစစ်ကဒ်အမှတ်ကိုလည်းကောင်း ဖော်ပြရပါမည်။

၈။ အလားတူချက်လက်မှတ်၏ကျောဘက်တွင် (၆) ချက်လက်မှတ်ပိုင်ရှင်၏ ထိုးမြဲလက်မှတ် နမူနာတစ် ခုနှင့် နေရပ်လိပ်စာကို ဖော်ပြရပါမည်။ ငွေထုတ်ယူပြီးသောအခါ ရရှိကြောင်း လက်မှတ်ရေးထိုးရပါမည်။ ကိုယ်စားလှယ်ဖြင့်ထုတ်ယူပါက ပိုင်ရှင်၏ လက်မှတ်ရှည်နှင့် အမည်၊ ရာထူး/အဆင့်၊ နေရပ်လိပ်စာအပြင် (၇) ကိုယ်စားလှယ်၏လက်မှတ်၊ ကိုယ်ပိုင်အမှတ် သို့မဟုတ် နိုင်ငံသားစိစစ်ကဒ်အမှတ်၊ အမည်၊ ရာထူး/အဆင့်၊ နေရပ်လိပ်စာကို ဖော်ပြရပါမည်။

 ၉။ သို့ပါ၍ အထက်ပါချက်လက်မှတ်ပိုင်ရှင်က ဖြည့်သွင်းရမည့်အချက်များ ဖြည့်သွင်းရန်ကျန်နေလျှင် ကိုယ်တိုင်ဖြစ်ပါက ဘဏ်ခွဲမန်နေဂျာက ခေါ်ယူဖြည့်သွင်းစေပြီး ကိုယ်စားလှယ်ဖြစ်ပါက ချက်လက်မှတ်ပိုင်ရှင်မှ လိုအပ်သည်များ ဖြည့်သွင်းစေရန် ထိုချက်လက်မှတ်ကို ငြင်းပယ်ချက်လက်မှတ် (Returned Cheque) အဖြစ်သတ်မှတ်၍ ထိုချက်လက်မှတ် တင်ပြလာသူ အား ပြန်လည်ပေးအပ်မည်ဖြစ်ကြောင်း အသိပေး အပ်ပါသည်။

                                                                                                                                                အုပ်ချုပ်မှုဒါရိုက်တာ

English